Unmada Sithwam


උන්මාද සිතුවම් / Unmada Sithuwam

 

Unmada Sithuwam

 

[huge_it_video_player id=”26″]


 

උන්මාද සිතුවම් මැවේ බිඳේ
මීදුම් වළා මැද අතීතයේ
බිඳුණු පෙමින් ගිණිගත් හදවත්
තනිවේවි එක්ටැම් ගේ

අනන්ත සයුරේ බියකරු දිවි දියඹේ
පාළු හුදකලා සුළඟ පමනි උරුමේ
හඩා වැටෙන සිත සදා සරණ මට
තනිවේවි එක්ටැම් ගේ

උන්මාද සිතුවම් මැවේ බිඳේ ……..

දහසක් මල් මැද එකම මලයි පැතුවේ
එ මල කිමද සරදම් කර සැඟව ගියේ
දැනේ තවම මට මලේ සුවඳ පොද
තනිවේවි එක්ටැම් ගේ

උන්මාද සිතුවම් මැවේ බිඳේ ……..

සිනමාපටය: එක්ටැම් ගේ – 1980

ගායනය: විශාරද ගුණදාස කපුගේ මහතා

ගේයපද: මහාචාර්ය සුනිල් ආරියරත්න මහතා

සංගීතය: සරත් දසනායක මහතා

අධ්‍යක්‍ෂණය: හර්බට් රංජිත් පීරිස් මහතා


එක්ටැම් ගේ – 1980

සිංහල සාහිත්‍යයේ ප්‍රසිද්ධ එක් ටැම් ගෙවල් දෙකක් හමුවේ. පඩුවස්දෙව් රජුගේ දියණිය වූ උන්මාද චිත්‍රා සිය සොයුරන් විසින් සිය රාජ්‍යයත්වය පිළිබඳවු බියක් හේතුවෙන් එක් ටැම්ගෙයක සිරකර පුවත අප අසා ඇත්තේ කුඩා කාලයේදීය. දෙවන එක්ටැම් ගේ අපට හමුවන්නේ හර්බට් රන්ජිත් පිරිස් ශුරීන් විසින් අධ්‍යක්‍ෂණය කර 1980 දී රිදී තිරයේ දිග හැරුනු එක්ටැම් ගේ සිනමා නිර්මාණයයි.
එක්ටැම් ගේ  සිනමා පටියේ මාලි (මාලිනි ෆොන්සේකා) ඉතා දුකසේ ජීවනෝපාය ගෙනියන මවකගේ දුවක්. මේ මවගේ ජීවනෝපාය වුයේ බත් සැපයිමයි. මෙම නිවසට නිතර යන එන විල්සන් ( ජෝ අබේවික්‍රම) ස්වොත්සාහයෙන් දියුණුවන තලතුනා වයසක් ඇති කෙනෙක්. මෙම නිවස අසල ඇති වැඩපොලක සුපවයිසර් කෙනෙක් වන සරත්ට (රවීන්ද්‍ර රණ්දෙනිය) මාලි ගැන අදහසක් පහල වෙනවා. ඔහු කෙලිදෙලෙන් ගෙවන කෙනෙක් වුවත් ඔහුට මාලි ගැන ඇතිවෙන්නේ අවංක ආදරයක්. මේ අවංකකම කෙතරම්ද කියනවනම් ඔහු තමන් මීට පෙර තරුණියන් දහතුන්දෙක් හා සම්බන්දකම් පැවැත්වූ බව මාලි හා පවසනවා. ඔහුගේ අවංකකම හඳුනා නොගන්නා මාලි ඔහුගේ ආදරය සැක කරනවා. මේ අතර විල්සන්ගෙන් මාලිට විවාහ යෝජනාවක් එන්නේ විල්සන් තම නමට ගත් ලොරිය සඳහා බාරයක් ඔප්පු කිරීමට කතරගම වන්දනාමාන කරන අතරමයි. මාලිගේ මව මේ ගැන කිසිදු දෙගිඩියාවක් නැතුවම කැමත්ත දෙනවා. මාලිද සිය හිත තුල වූ සැක සංකා නිසාම විල්සන්ට් හට කැමත්ත දෙනවා. ඒත් විල්සන් කියන්නේ මුදල් මත ජීවිතය මෙහෙයවන කෙනෙක්. මාලිගේ වයසත් සමඟ විල්සන්ගේ නොගැලපීම් මතුවෙන්නේ මාලිගේ හිතේ මතුවෙමින් යට යන පැරණි ආදරය හේතුවෙනි. විල්සන්ගේන් ඉවත් වන ඇය, ඈ නොපිළිගත් ආදරය සොයනවා. ඒ වන විට අර සුපවයිසර්වරයා සමාජ ආශ්‍රයෙන් ඈත්ව, එක්ටැම්ගෙයක (ප්‍රදීපාගාරයක) ජීවත්වන බව ඇයට ආරංචි වෙනවා. උන්මාද සිතුවම් මැවේ සිදේ ගීතය මතුවෙන්නේ එක්ටැම්ගේ සිනමා පටියේ අවසාන යාමේදී. එනම් මාලි තම පැරණි පෙම්වතා බලන්න යන ගමනේදී.

උන්මාද සිතුවම් මැවේ බි‍ඳේ
මීදුම් වලා මැද අතීතයේ
බිඳුණු පෙමින් ගිනි ගත් හදවත්
තනි වේවි එක් ටැම් ගේ

මහාචාර්ය සුනිල් ආරියරත්නයන් විසින් විරචිත, සරත් දසනාකයන් විසින් සංගීතය සම්පාදනය කල එක්ටැම්ගේ ගීතය ගයන්නේ අප අතරින් වියෝවූ ගුණදාස කපුගේ ශුරින් විසින්. මේ ගීතය සදහා ගායකයෙක් තෝරාගැනිම ගැන විවාදයක් ඇතිවී තියෙනවා. බොහෝ අය අමරදේවයන් යොජනා කරද්දී මේ ගීතයට ගැලපෙන්නේ කපුගේ ගේ කාලකන්නි හඬ කියා සරත් දිසානායකගේ තීරණයට හැමෝම එකඟ වෙලා තියෙනවා. කපුගේ ගේ කාලකන්නි හඬ මේ ගීතය පුරාවටම රසිකයා සලිත කරනවා. (ඔය කියන කපුගේ ගේ කාලකන්නි හඬ උල ලේනෝ ගීතයේත් තියෙනවා.) එක්ටැම්ගේ සිනමාපටියේ මතුවීමට මුලිකව බල පෑවේ මෙම ගීතයයි. සමස්ත සිනමා පටියම විනාඩි තුනකට කැටි කීරීමට මෙම ගීතය සමත් වෙයි.

ගීතය පටන් ගන්නේ උන්මාද වචනයෙන්. එය මා කලින් සදහන් කල උන්මාද චිත්‍රා ගේ එකටැම් ගෙට පාඨකයා සම්බන්ධ කරයි. එහෙත් වෙනසක් ඇත. උන්මාද චිත්‍රා එක්ටැම්ගේ ගතවුයේ දේශපාලන හේතුවක් ලෙස මිස ස්වකැමැත්තෙන් නොවේ. එහෙත් සිනමාපටියේ එක්ටැම් ගතවන්නේ ස්වකැමැත්තෙන්ම මෙන්ම චිත්‍රාගෙන් නොව සමාජයෙන් ම ලැබෙන ඇරයුම ද ප්‍රතික්ෂේප කරයි.

අනන්ත සයුරේ බියකරු දියඹේ
පාළු හුදකලා සලඟ පමණි උරුමේ
හඩා වැටෙන සිත සදා සරණ මට
තනි වේවි එක් ටැම් ගේ

උන්මාද චිත්‍රාව එකටැම්ගෙයක සිරකරන ලද්දේ එහි සිට සමාජ සම්බන්ධතා පැවැත්විය නොහැකි නිසා විය යුතුය. එහෙයින් එකටැම්ගෙයක් ඇති පාළුව හුදකලාව ගැන වෙනත් වචන නැත.

දහසක් මල් මැද එකම මලයි පැතුවේ
එමල කිමද සරදම් කර සැගව ගියේ
දැනේ තවම මට මලේ සුවඳ පොඳ
තනි වේවි එක් ටැම් ගේ

දහසක් මල් මැද එකම මලයි පැතුවේ. ඔහු කිහිප දෙනෙක් ඇසුරු කල ද ඔහු පැතුවේ මාලි පමණය. මෙම ගීතයේ සංවේදීතම තැන මෙතනයි. එය තමන්ගේ කෙළිකාරකමට ලද අපූරු දඬුවම් ත්‍යාගයකි. එහෙත් ජීවිතයේ සමහර අවස්ථා යලි නිවැරදි කල නොහැක. එක්ටැම් ගේ සිනමාපටිය නරඹා ගීතය රසවිදින්න. නිසැකයෙන්ම ඔබ රසවිදින්නේ පෙර ඔබ රස විදි ගීතය නොවේ.


ගායනය: විශාරද ගුණදාස කපුගේ මහතා


ගේයපද: මහාචාර්ය සුනිල් ආරියරත්න මහතා


සංගීතය: සරත් දසනායක මහතා


අධ්‍යක්‍ෂණය: හර්බට් රංජිත් පීරිස් මහතා